þar sem dvergar búa í steinum og vofur læðast hljótt

DÆGURÞRAS klukkan 1700 laugardaginn 1. mars í Draugasetrinu á Stokkseyri
Þau minna á fjallvötnin fagurblá - Um dægurlagatexta og samfélag á seinni hluta tuttugustu aldar
Kristín Einarsdóttir þjóðfræðingur og Ragnheiður Eiríksdóttir (Heiða í Unun) fremja dægurþras

Kristín fjallar um dægurlög og texta sem þjóðin gerir að sínum, syngur á böllum í rútuferðum, í útilegum og fjallaskálum. Þessi lög eru í raun hennar eigin skáldskapur, það er fólkið í landinu sem ákveður hvað fellur þjóðarsálinni í geð, hitt hverfur, skýtur ekki rótum, jarðvegurinn hafnar þeim. Vinsældir dægurlaga og texta hljóta að gefa til kynna að þeir eigi erindi í sinn samtíma.Í fyrirlestrinum er leitast við að skilja hvaða samfélag það er sem birtist í vinsælum dægurlagatextum, hverjar eru hetjurnar, hver er staða konunnar, hverjar eru vonir og þrár þeirra sem sungið er um eða sungið til? Til að gestum gefist enn betra tækifæri og tóm til að átta sig á umræðuefninu syngur Heiða nokkur vel valin lög og leikur undir á gítar.

 

Athugasemdir

[Ása Ninna Katrínardóttir (IP-tala skráð) 29.2.2008 kl. 20:24]

Mæli með þessu! ;)

En ætlaði alltaf að spyrja þig Kristín, hvenær verður þáttunum okkar útvarpað?

[kristin einarsdottir (IP-tala skráð) 29.2.2008 kl. 20:53]

hæ - þeir verða í apríl og ég sendi á ykkur hvenær hver og einn þáttur verður - kv. KE

[Soffía (IP-tala skráð) 1.3.2008 kl. 16:24]

Ligg hérna heima hundlasin og drullufúl. Var búin að véla tvær vinkonur með mér í draugasetrið - það verður ekki af því

Vona að uppistandið gangi súpervel enda fróðlegt og skemmtilegt bæði í senn